Красноармейски районӗнчи Янмурҫин ялӗнче вырӑнти хастарсем Этнографи музейӗ уҫнӑ. Вӑл унччен фельдшерпа акушер пункчӗ пулнӑ ҫуртра вырнаҫнӑ.
Этнографи музейне 2020 ҫулта ялти икӗ хӗрарӑм уҫнӑ. Юлия Леонидова тата Апполинария Иванова тӑван ялта авалхи документсене, сӑнӳкерчӗксене, ял историйӗпе ҫыхӑннӑ экспонатсене тирпейлӗн пухса пӗр вырӑнта вырнаҫтарнӑ.
Янмурҫин ялӗнче ФАП-ӑн ҫӗнӗ ҫуртне 2014 ҫулӑн вӗҫӗнче уҫнӑ. Кунти фельдшерпа акушер пункчӗ ҫавӑн пекех Кӗрекаҫ тата Пайсупин халӑхне йышӑнать.
Шӑрӑх кунра, паллах, шывра чӑмпӑлтатас килет. Анчах унта инкек пуласси те инҫех мар.
Ҫурла уйӑхӗн 12-мӗшӗнче Красноармейски районӗнчи Танӑш ялӗ ҫывӑхӗнчи пӗвере ҫамрӑк путса вилнӗ. Инкеклӗ лару-тӑру министерстви пӗлтернӗ тӑрӑх, вӑл 2006 ҫулта ҫуралнӑскер пулнӑ.
Палӑртмалла: ҫулталӑк пуҫланнӑранпа Чӑваш Енре 28 ҫын путса вилнӗ. Вӗсенчен 8-шӗ – 18 ҫула ҫитмен ачасем.
Красноармейски районӗнче ватӑ хӗрарӑм ҫухалнӑ. 72 ҫулти Людмила Федоровӑна «Лиза Алерт» шырав отрячӗн хастарӗсем шыраҫҫӗ.
Хӗрарӑм ӑҫтине унӑн ҫывӑх ҫыннисем утӑ уйӑхӗн 13-мӗшӗнченпе пӗлмеҫҫӗ.
Хӗрарӑм 150 сантиметр ҫӳллӗш, начар кӗлеткеллӗ, хӑмӑр куҫлӑ, кӑвакарнӑ ҫӳҫлӗ. Килӗнчен тухса кайнӑ чухне вӑл мӗн тӑхӑннине пӗлмеҫҫӗ.
Людмила Фёдорова ӑҫтине пӗлекенсене 8(800)700-54-52 е 112 телефон номерӗсемпе ҫыхӑнма сӗнеҫҫӗ.
Утӑ уйӑхӗн 1-мӗшӗнче Красноармейски районӗнчи Чатукасси ялӗнче «Хоровая наставническая столица Чувашии» фестиваль-конкурс иртнӗ. Ӑна Филипп Лукин паллӑ чӑваш композиторӗ ҫуралнӑранпа 110 ҫул ҫитнине халалланӑ.
Унта Элӗк, Ҫӗрпӳ, Канаш, Елчӗк, Ҫӗмӗрле, Комсомольски, Шупашкар, Сӗнтӗрвӑрри тата Красноармейски тӑрӑхӗсенчи, Ҫӗмӗрле, Ҫӗнӗ Шупашкар, Шупашкар хулисенчи халӑх хорӗсемпе вокал ансамблӗсем, Раисӑпа Николай Андреевсем, Тутарстанпа Мари Элти пултарулӑх коллективӗсем хутшӑннӑ.
Пухӑннисем умӗнче паллӑ чӑваш композиторӗн мӑнукӗсем Марианна Левитова тата Филипп Патеев, «Трак ен» ентешлӗх ертӳҫи Иван Архипов тата ыттисем тухса калаҫнӑ.
Красноармейски районӗнчи Йӗпрем ялӗнче пӗвере ҫамрӑк путса вилнӗ. Вӑл 20 ҫулта пулнӑ.
Инкеклӗ лару-тӑру министерстви пӗлтернӗ тӑрӑх, ҫӗртме уйӑхӗн 27-мӗшӗнче вӑл ӳсӗрле шыва кӗнӗ. Каччӑ Шупашкартан килнӗскер пулнӑ.
Малтанлӑха палӑртнӑ тӑрӑх, каччӑ шыва кӗме юраман ҫӗрте пӗвене кӗнӗ. Унӑн виллине шыравпа ҫӑлав службин ӗҫченӗсем тепӗр кунхине кӑларнӑ.
Чӑваш Енре дояркӑсен тата выльӑх-чӗрлӗхе искусствӑлла майпа пӗтӗлентерекенсен конкурсне ирттересси чылай ҫул каяллах йӑлана кӗнӗ. Ял хуҫалӑхӗнче тӑрӑшакансене ҫапла майпа хавхалантарни, пӗр-пӗрин опычӗпе паллаштарни, малалла талпӑнма илӗртни питех те аван.
Ӗнене машинӑпа сӑвакан операторсем (ӗнене алӑпа сума тахҫанах пӑрахнӑ ӗнтӗ) тупӑшӑва кӑҫал та пухӑнӗҫ.
Конкурс ҫӗртме уйӑхӗн 15-мӗшӗнче Трак тӑрӑхӗнче, унти «Красное Сормово» хуҫалӑхра, иртӗ. Унта тӗрлӗ тӑрӑхри 21 оператор хутшӑнӗ.
Красноармейски районӗнчи Тури Чуракасси ялӗнче ҫуралса ӳснӗ Владислав Павлова контр-адмирал ятне панӑ. Хушӑва РФ Президенчӗ Владимир Путин алӑ пуснӑ.
Вӑл Киеври аслӑ ҫарпа тинӗс политика училищинчен вӗренсе тухсан Лӑпкӑ океан флотӗнче ҫар тивӗҫне пурнӑҫланӑ. 2013 ҫулта 1 ранг капитанӗн ятне илнӗ. Кайран Ҫурҫӗр флочӗн командующийӗн ҫумӗ пулнӑ, тепӗр 2 ҫултан РФ Ҫар вӑйӗсен командующийӗн ҫарпа политика ӗҫӗ енӗпе ҫумӗ пулнӑ.
Красноармейски район администрацине урӑх ҫын ертсе пыма пуҫланӑ. Ку пукана Павел Юрьевич Семенов йышӑннӑ. Ҫӗртме уйӑхӗн 1-мӗшӗнче депутсем пухура унӑн кандидатурине пӗр саслӑн пулса ырланӑ.
Павел Семенов - 34 ҫулта. Унччен вӑл Канаш районӗнчи Сухайкасси ял тӑрӑхӗн администрацийӗн пуҫлӑхӗ пулнӑ. Ку должноҫе вӑл 27 ҫулта йышӑннӑ. Вӑл ӗҫленӗ ҫулсенче ял тӑрӑхӗ Пӗтӗм Раҫҫейри "Чи лайӑх муниципалитет практики" конкурсра малтисен йышне кӗнӗ.
Палӑртмалла: Красноармейски район администрацийӗн пуҫлӑхӗ унччен Борис Клементьев пулнӑ. Вӑл кӑҫал ака уйӑхӗнче ӗҫрен хӑйӗн ирӗкӗпе кайнӑ.
Куславкка районӗнчи Кармал ялӗнче тата Красноармейски районӗнчи Ҫеҫмерте 2020 ҫулта ҫуралнӑ арҫын ачасем путса вилнӗ.
Кармалта инкек ҫу уйӑхӗн 29-мӗшӗнче пулнӑ, Ҫеҫмерте вара – ҫу уйахӗн 30-мӗшӗнче.
Палӑртмалла: юлашки эрнере республикӑра 5 ача путса вилнӗ. Аса илтерер: Канаш районӗнчи Шӑхасан ялӗнче 8-9 ҫулсенчи 3 хӗрача шыва анса кайнӑ. Вӗсем Кӗҫӗн Ҫавалта шыва кӗнӗ.
Ӗнер Красноармейски районӗнче тухтӑрсем пациента васкавлӑ медпулӑшу машини патне урапапа тӗксе тухнӑ. Кун пирки «Контактра» халӑх тетелӗнчи «Красноармейское – Трак Ен» ушкӑнра пӗлтернӗ.
Ку Кӑлава Шетмӗ ялӗнче пулнӑ. Ҫак ялти пӗр урама Шетмӗ юханшывӗ уйӑрать. Ун урлӑ йывӑҫ кӗпер сарнӑ. Анчах ҫырмана анса хӑпарма хытӑ сийлӗ ҫул ҫук. Тракторсем, паллах, лачакара та анса хӑпараяҫҫӗ. Анчах васкавлӑ медпулӑшу машини пылчӑка пула унта кайман. Тӗнче тетелӗнче вара кӗпер юсавсӑр тесе сӑмах сарӑлнӑ.
Мӑн Шетмӗ ял тӑрӑхӗн администрацийӗн ертӳлӗхӗ пӗлтернӗ тӑрӑх, кӗҫех ку кӗпере пуҫарупа пухнӑ укҫа программипе юсамалла. Документсене хатӗрлесе ҫитернӗ, ҫывӑх вӑхӑтра вӗсене Ял хуҫалӑх министерствине ҫитермелле.
+19.3 °C